Edito

Miaina rano raraka

Edito
Alakamisy 01 Aprily 2021

Na inona na inona fanazavana ny zava-mitranga rehetra eto amin’ny firenena amin’izao fotoana izao dia azo fehezina amin’ny hoe miaina rano

raraka isika ankehitriny. Amin’ny lafiny rehetra io. Politika, toekarena, sosialy, kolontsaina, fanatanjahantena sy ny hafa tsy voatanisa. Tsy inona akory izay rano raraka tsy azo raofina izay fa ilay fanapahan-kevitra tara tamin’ny fanidina sisin-tany nitranga tokony ho natao tamin’ny faraparan’ny taona 2019. Mila karohina aingana, noho izany, izay fomba hatsakana rano afaka hamelona ny vahoaka malagasy ho atao anatin’ny sinin’ny fanavotam-pirenena hamelomana indray ireo sehatra misy rehetra ireo. Ny zava-misy anefa dia iaraha-mahita fa vao miha marefo ny toekarem-pirenena. Miha mahery vaika ny valanaretina tafiditra eto amin’ity firenena ity ary hita ho mampitombo ny faharefoan’ny mponina koa raha mijery ny tarehimarika momba ny fahafatesan’ireo mpiray tanindrazana maro tato ho ato. Tsy maha resy lahatra ny fomba hifehezan’ny mpitondra ny fiakaran’ny vidin’entana ilaina an-davan’andro fa dia mbola io izy mampikaikaika ny vahoaka Malagasy tsikaritra ho miha mitrongy vao homana isan’andro io. Nanao ny nafitsony koa ny tary amin’ny fanatanjahantena nandrandraina fa mbola mba hany hitondra firaisankinam-pirenena sy hany sisa hitondra fifaliana kely ho an’ny sarambabem-bahoaka tary. Maro no efa voalaza momba azy iny nialoha sy nandritr’ireo lalao natrehin’izy ireo farany saingy toy izay mitranga eo amin’ny fitantanana ankampobeny ny firenena ankehitriny ihany angamba ny hadirin’ny tsy fahaizana maka lesona, raha ny hita hatreto aloha. Enga anie mba ho diso ny famakafakana.

J. Mirija