Edito

Partagé sur :
• facebook

Faly sahirana ny vahoaka Malagasy amin’izao fotoana izao. Toa efa afa-doza amin’ny valanaretina, ka tsikaritra ho miverina amin’ny fiainana andavanandro izany ny fomba fiainan-dRamalagasy, raha ny hita soritra eto an-dRenivohitra.

Mbola tsy hananana antoka tanteraka anefa ny fandresentsika ny valanaretina ny fitiliana vita satria tsy ampy 10% amin’ny vahoaka Malagasy akory ny vita fitiliana. Marina fa miezaka manome antoka ny mpitondra, fa andalam-pandresena isika izao. Mihana ny tranga raha ny antontan’isa ofisialy, saingy azo lalaovina tsara io. Enga anie mba tena ny zava-misy marina no taterina. Miverina mitombo ny tranga any amin’ny firenena maro, toy ny any Eoropa izay manana ny ampy amin’ny fiarovana sy ny fiantrehana, ka tokony ho mailo isika. Etsy andaniny, mbola mafy ny fiantraikan’ny krizy, mbola sarotra ny asa fihariana indrindra fa ho an’ny orinasa, mbola baraingo ny fanavotana ireo mpiasa natsahatra tamin’ny asany, ny vidim-piainana miha midangana, ny sandam-bola mitotongana, ny vahoaka bokan-trosa ny ankamaroany,... Na ny tamba-bidin’ny herinaratra ho an’ny Jirama, ny hetra mitambatra satria afaka nahemotra ny fandoavana azy, ny hofan-trano, ny ekolazy sy ny fampidirana mpianatra, ny fandoavana ny volan’ny CNaPS nindramina, ... dia mbola trosa miandry avokoa. Ny mpitondra fanjakana etsy andaniny, toa miezaka manao seho politika hoenti-maneho fa manga ny lanitra. Toa mbola endrika propagandy izany hatrany no hita soritra. Toa tsy te hahalala izay kihana izany ny mpitondra, ary mihevitra fa tena mety ny ataony. Ny manahirana anefa, dia maro ny geja toa hoenti-manapina ny feo sy fanehoan-kevitra ankoatra ny azy sy ny mpomba azy. Toa natao hangejana ny fahalalahana ny hamehana. Asa izay hiseho aoriana ao, fa raha ny zava-misy aloha, dia ahiana hipoaka ny sarom-bilany eo anatrehan’ny krizy lalina miseho, raha tsy misy angaha ny finiavana sy vahaolana maharitra sy azo tsapain-tànana. Asa mihevitra ve ny mpitondra fa tena adinon’ny vahoaka ny tsy mety ataony, aferafera, fitantanana tsy mangarahara.

Toky R

Tia Tanindrazana

Samia mijoro ho an'i Gasikara.