Edito

Partagé sur :
• facebook

Miandry ny fahaterahan’ny governemanta vaovao ny rehetra. Hifandraika amin’ny tolona sy ny fitakiana natao amin’izay sa ny omaly tsy miova ?

Tany amin’ny fanendrena ny praiminisitra mantsy, dia ireny niaraha-nahita ireny ny somary lonilony teo amin’ny depiote, ka na ny mpiray antokoa aza nisy ny nahafantatra, fa tao kosa ny sanganehana tsy nahalala izay ambonin’ny tany. Voalamina sy tsy hiadian-kevitra intsony iny, fa aty anaty governemanta indray mifampitazana e ! Fa ny fanontaniana mipetraka hatreto, dia ny hoe tena hivoaka tokoa ve ny tolona aorian’ny fitsanganan’ny governemanta eo ? Inona ohatra no antoka hilazana fa tena hisy tokoa ny fifidianana madio sy mangarahara ary handraisan’ny rehetra anjara ? Raha hiverenana hatrany ny tantara dia resaka lalàm-pifidianana no niantombohan’ny tolona noho ny kajikajy maloton’ny HVM hitazona mora foana ny fahefana. Mety efa lavo amin’ny ampahany ny fitondrana Rajaonarimampianina, saingy ny rafitra maro aloha tsy mbola voadio eto.  Mbola manangasanga eo hatrany hatrany kosa ny vahiny izay toa mbola mandidy sy manapaka eto. Na ny heverina ho manana hazon-damosina amin’ireo mpitondra antsika aza, toa tsy afa-manoatra e ! Tsy tena ampy hitsarana ny fahombiazan’ny tolona aloha ny faharavan’ny governemanta na efa zava-dehibe aza, fa mbola tolona sy ady goavana ny tena hampangarahara ny fifidianana sy hisian’ny tena safidim-bahoaka, fa tsy saritsarim-pifidianana sy saribakoly tsara homana no efa miandry hapetraka eo. Mbola misy tolona goavana miandry antsika e !

Toky R

Tia Tanindrazana

Samia mijoro ho an'i Gasikara.