Edito

Partagé sur :
• facebook

Miaiky ankehitriny ny fitondrana foibe fa misy ny kere any amin’ny faritra Androy sy Anosy. Ny sampan’asa misahana ny fampandrosoana amerikanina mantsy dia efa nanaraka ny zava-misy tany an-toerana hatramin’ny voalohan’ny volana oktobra teo.

 Talohan’izay anefa dia maro ny resaka  natao. Nolazaina  mihitsy fa namorona sary tsy nisy akory ny mpanao gazety malagasy  niezaka nitatitra ny  zava-misy any an-toerana. Ny fisolelahana nataon’ireo olom-boafidy sasany  avy any an-toerana  koa moa etsy an-daniny efa tsy  anerany intsony. Fa ny tena mahavariana dia ilay foto-pisainana mora mino raha  vahiny no  milaza  zavatra amin’ny tena  fa raha fanambaran’ny mpiray tanindrazana  kosa dia tsy  inoana ho marina  sy tsy  omen-danja akory. Tsy afaka  am-bavan’ny Malagasy izay mbola  manana ny fitiavana ny fireneny  intsony ankehitriny ny  anarana  hoe « iles éparses » isaky  ny misaina  ny  fahoriana sy ny  fahantrany ny maro. Nosy nomen’Andriamanitra antsika mantsy  ireo nosy  ireo ary iza no tsy mahalala fa  feno otrikarena  ireo nosy ireo ka izany no  ifikiran’ny  frantsay amin’izy ireo. Manomboka mampiaka-peo ary ankehitriny ny Malagasy  ka hihaino indray ve ny mpitondra sa mbola  hanao be marenina  toy  ny fanaony ? Isaky ny misy  mantsy  ny fotoana  tokony  hanehoan’ny  filoham-pirenena malagasy ny tena  hevitry ny  Malagasy  dia toa  ialany ilany  hatrany  izany. Ilay  mbola  fiankinan-doha amin’ny  vahiny ve no  mahatonga  izany sa tahotra fotsiny izao ? Inona   anefa no tokony  hatahorana raha toa ka na ny firenena mikambana aza efa  miaiky fa an’i Madagasikara  ireo nosy ireo ary  mampirisika  aza ny  firenena mikambana  ny  hamerenana ireo nosy ireo amin’i Madagasikara. Ny  mahavarina   dia  ny mpitondra antsika  indray no tsy taitra.  Sa  efa  nahazo  kopaka  isasahana any  ambadika any  sanatria ? Enga anie ka tsy   ho marina fa  raha sanatria  tokoa mantsy  ka izay no zava-misy dia  fivarotana tanindrazana fotsiny izao izany. Rahoviana  vao hijoro amin’ny  maha an’ny  Malagasy azy i Madagasikara  ka hifampihaino sy  hifanaja ny  samy Malagasy  fa tsy hifampitoroka ary tsy ny vahiny  intsony no  hibaiko sy  hanjakazaka eto amintsika ?

Tia Tanindrazana

Samia mijoro ho an'i Gasikara.