Edito

Partagé sur :
• facebook

Resaka tsy mety vita ny fitantanana ny fiantsonan’ny fiara eto Antananarivo Renivohitra.

Mitombo isa isan’andro ny fimenomenon’ny olona momba ilay orinasa Easy Park mitantana ireo parking. Tsy ny fanatsarana sy ny fandaminana ny olana fa ilay fomba fiasa, hoy ireo nohadihadiana. Mahatsapa ireo mpampiasa fiara fa misy endrika fanararaotana ny fanaovana ilay « contravention ». Ny fanentanana sy fampahafantarana rahateo moa maivana be mba tsy lazana hoe tsy misy.                                                                                                                                      Nanao fitokonana fanairana ihany koa omaly ireo andiany 4 avy ao amin’ny polisy monisipaly noho ny tsy fankasitrahan’izy ireo ny nametrahan’ny Easy park ao amin’ny taratasy fanaovany « contravention » ny sary famantarana ny polisy monisipalin’Antananarivo Renivohitra, tsy ara-dalàna izany, hoy izy ireo satria tena sehatra ivelan’ny kaominina mihitsy ity orinasa misahana ny « Parking » ity. Manaitra ny tompon’andraikitry ny kaominin’Antananarivo Renivohitra ihany koa izy ireo mba handinika tsara ny zava-misy fa tsy sanatria handrahona indray ny polisy monisipaly. Ny ahiahy tsy hihavanana, hoy ny Malagasy. Efa mba fotoana kosa angamba izao hitondran’ny kaominina sy ny Easy park fanazavana matotra kokoa fa tsy sanatria hanao be marenina mandavan-taona manoloana ny fahasorenan’ny olona satria ny erikerika anie ka mahatondra-drano e !

RTT

Tia Tanindrazana

Samia mijoro ho an'i Gasikara.