Edito

Partagé sur :
• facebook

Any Mantasoa indray no hifamotoana ny mpikamban’ny governemanta anio sy rahampitso. Ny raharaham-pirenena sy ny fampandrosoana hatrany aloha no ambara fa hodinihina sy hifampiresahana. Tsy vita etsy Iavoloha sy Ambohitsorohitra intsony ve ny fandinihana ny raharaham-pirenena, ka tsy maintsy handaniam-bola sy hivoahana lavitry ny renivohitra ?

Raha ny volabe nolaniana sy nilibana tamin’ny filankevitry ny governemanta nitety faritra saika nanerana ny renivohi-paritany izay sy ity hetsika hafa atao any Mantasoa ity efa nahavitan-javatra maro. Ny fampanantenana poak’aty hatrany anefa no mitosaka isak’izay miloa-bava, fa izay fandraisan’andraikitra hoenti-mamaha ny fahasahiranam-bahoaka dia mbola lavitry ny kitay ny afo. Tsy manompo vahoaka fa manompa ankitsirano na tsy mivantana aza, fa amin’ny alalan’ny fihetsika. Aiza ho aiza izao ilay fampanantenana ny mpatory an-dalana nataon-dRajaonarimampianina fa hitadiavana vahaolana maharitra nandritra ilay fizarana hanin-kely indray alina iny ? Sa kosa mbola hiandry propangandy, ka hatsofoka ao amin’ilay vina fisandratana 2030 indray ny hoe: hofoanako ao anatin’ny telo volana ny “4mi”, telo volana dia hahazo asa ny tanora maro be … Toa efa toy ny rano mandeha fotsiny ny balarora mila ho isan’andro. Mbola sahy manompa vahoaka ao anatin’ny fahasahiranana amin’ny fandanilaniam-poana tsy mitondra vokatra. Ara-bakiteny ny hoe miliba sy mihinana alahelon’ny Malagasy amin’ny firobarobana amin’ny volam-panjakana. Misy fetrany sy misy tsininy io !

Tia Tanindrazana

Samia mijoro ho an'i Gasikara.