Edito

Mandroso mihemotra

Edito
Talata 11 Oktobra 2016

Efa toy ny kilalaon-jaza ny hetsi-pitakiana eto amin�ny firenena ankehitriny. Na hetsika politika na fitakiana sendikaly dia mandroso mihemotra toy ny lelon-jaza avokoa.

Mbetika hanala ny mpitondra amin’ny toerany fa efa tena tsy mandeha amin’ny laoniny intsony ny raharaham-pirenena. Mbetika milaza fa tsy maha maika ny fanonganana fa mbola hifampidinika. Dia toy izany koa ny zava-misy amin’ny fitakiana sendikaly ankehitriny ka hanambarana fa hahemotra ny fitokonana fa mbola mandray fihaonana iraisam-pirenena isika. Tsy fahasahiana sa tsy fahamatorana? Nafana am-boalohany ny an’ny mpiraki-draharahan’ny fitsarana saingy mangataka andro lava izay iaraha-mahita fa efa am-bolana maro saingy tsisy vokany. Ny an’ny mpampianatra ihany koa efa miha manomboka maty ny afo na dia milaza ny tsy hanaiky tambazam-bola aza ny mpitarika. Ny teo anivon’ny orinasa Air Madagascar aza moa tsy hita izay niafarany. Tsy mba haintsika mihitsy ny mandray fanapahan-kevitra matotra fa dia mivadibadi-dela lava. Very an-javony ny dingana efa vita noho izay tsy fahamatorana izay ka lasa resabe sisa ny tolona tian-kapetraka izay zary mihena hery am-pitoerana toy ny fen’antitra. Tsy mety tody amin’izay tena tanjona fa rava eny an-tenantenany sy maty momoka izay ezaka mba natao fa mahery firehitra am-boalohany toy ny afo-mololo fotsiny.

Toky R.