Edito

Mandiso adihevitra

Edito
Zoma 24 Martsa 2017

Tsy maintsy mihomehy anaty ihany ianao rehefa mandre

tompon’andraikitra manome fanazavana amina tandrevaka na hadalana nataon’ireo eo ambany fifehezany. Mahavatra mihitsy izy ireo tato ho ato mandiso ny adihevitra izay tena tokony hipetraka manoloana ny trangana raharaham-pirenena eto amintsika. Efa voatsikera matetika ny mikasika ireo karazam-panilihan’andraikitra fanaon’izy ireo fa ny tena mahalasa saina dia ireo fihetsika sy fanazavana tontosaina andrim-panjakana ambony samihafa. Nahagaga ny mpanara-baovao ihany, ohatra, ny mbola namongarana ilay razana nametrahan’ny fianakavian’ny maty fitoriana fa hoe tsy nodidian’ny hopitaly akory nefa nandaniana volabe fony notsaboina ny talata teo. Fa naninona no tsy voaporofo fony mbola teo am-bohitra ny marina fa voatery andro talata taorian’ny fandevenana ? Nanome fanazavana koa ireo tompon’andraikitry ny fitandroana ny filaminana omaly mikasika ilay balafomanga nirefotra teny Betongolo fa hoe tsy nahy no nahatonga azy iny. Kanefa mbola hohadihadiana indray, hono, raha noho ilay biriky latsaka tamin’ny trano nianjera no nandratra ireo lasibatra na noho ilay balafomanga. Moa ve tsy ilay balafomanga no nanenjera ireo biriky ?

Mirija