Edito

Mandeha ny fotoana

Edito
Sabotsy 22 Jolay 2017

Tsy vao izahay no nilaza fa latsaka an-katerena ny firenena, hoy ny vovonana iray, izay nilaza ny fahitany ny toe-draharaha ankehitriny omaly.

Nilaza izy ireo fa manana vahaolana ialana ao anatin’ny lavaka misy ny firenena ankehitriny. Tsy izy ireo ihany anefa fa efa nilaza ho manam-bahaolana ary efa mba samy nandroso ny azy ireo avokoa ireo mpitabataba isan’andro amin’ny haino aman-jery. Ny zavatra tsikaritra dia toa vahaolana mitovitovy hatrany no miroso dia ny hoe fanomezana anjara toerana ny eny ifotony amin’izay. Mandeha ny fotoana kanefa dia mijanona ho fikaonandoha, atrikasa, valandresaka sy ny toy izany hatrany aloha, raha ny hitan’ny maso, ny vahaolana miroso rehetra. Miha sarotra arakaraka izay fivoaran’ny fotoana izay ny toe-draharaha. Ny vahoaka miha sahirana. Akaiky ny fifidianana kanefa tsy mety voarodan’ny mpanohitra, araka ny fanirian’izy ireo ny fitondrana izay lazainy fa tsy mahavita azy, hono, ka tokony hahatsapa tena hametra-pialana. “Rahoviana no hitranga i Bemolanga ?” , hoy ilay hira.

J. Mirija