Edito

Partagé sur :
• facebook

SOS indray no nasolo ny voin-kava-mahatratra. Soatoavina tena malagasy ny fifanampiana ary endrika isehoany ny voin-kava-mahatratra.

 Mety mandona ny fo kokoa sy miantefa amin’ny atifanahy angamba nefa rehefa ny tenim-bazaha SOS no ampiasaina, toy ny soratra hita mibaribary etsy anoloan’ny Lapa Maitso Anosikely. Miantso ny malalatanana hanome izay foiny hanampiana ireo Malagasy any atsimo sahirana amin’ny fivelomana noho ny asan-dahalo ireo Parlemantera, ahitana ny CT sy CST. Vao niainga io ketrika io dia efa tsy mitovy hevitra ny samy Parlemantera. Ny hafa milaza fa tsy tokony hojerena imaso fotsiny ny fahavoazan’ireo Malagasy any ireo ka mila tohanana, ny sasany indray mihevitra fa tsy loza voajanahary akory no miseho any atsimo ka anaovana SOS fa loza noforonina, ka tsy misy tokony hanerena an-kolaka an’Antananarivo izay efa sahiran’ny krizy handray anjara fa andraikitry ny fanjakana izany.

Etsy ankilany dia manomboka mba mametra-panontaniana ihany koa ny amin’ireo toerana voakilasy ho faritra mena noho ny asan-dahalo, toy ny any amin’ny ilany andrefana amin’ny faritra Amoron’i Mania sy Bongolava iny. Ripaky ny dahalo ny fananan’ny tantsaha, an’arivony no efa nitsoa-ponenana nefa tsy mba nisy hetsika voin-kava-mahatratra natao hanampiana azy ireny. Firifiry koa eto an-drenivohitra no mananontena sy kamboty tsy fidiny noho ny asan-jiolahy, nefa inona no mba fanampiana natao azy ireny ? Sa manao vain-drahalahy tsy maharary ?

Tia Tanindrazana

Samia mijoro ho an'i Gasikara.