Edito

Partagé sur :
• facebook

Tsy misy mandeha amin’izay laoniny intsony eto amin’ny firenena amin’izao na ara-tsosialy na ara-toekarena, indrindra ny ara-politika. Fanamaivanan-dresaka no ataon’ny fanjakana.

 Ny filoham-pirenena aza moa dia toa te hanala tena tsy ho tompon’andraikitra mihitsy. Firenena sahirana sy mahantra fadiranovana, hono, no noraisiny tamin’ny taona 2014 e ! Raha hendry dia manaja tena amin’izay fa tsy mbola miady sisika eo na efa hita izao aza fa tsy misy atokona. Adinon’ilay rangahy io angaha fa izy anie minisitry ny vola sy ny tetibola tao anatin’ny tetezamita e ? Tsy tadidiny angaha fa izy anie ka anisan’ireo 108 olona nosazian’ny fianakaviambe iraisam-pirenena noho ny fakana fahefana tsy ara-dalàna tamin’ny 2009 e ? Dia io fa manilika sy tsy te haloto ary minia mikipy kanefa ny fanjakany no tompondakan’ny kolikoly sy afera maloto hatramin’ny nahazoana ny fahaleovantena. Tsy nanarina fa nanohy ny ratsy niaraha-nanao tamin’ny tetezamita, kanefa dia mbola sahy milaza sy mamita-bahoaka fa nahavita be ary mbola hahavita. Efa fiaraha-mitantana indray izao, ka tsy hay izay hafitsoka atsy ho atsy rehefa misy ny tsy fahombiazana. Hamatotra ireo hafa niditra tao ho samy tompon’andraikitra fa rehefa misy kosa ny sombintsombin-pahombiazana, dia hiedinedina toy ny mahazatra fa tena nanao ary mbola hanao. Seho ivelany no betsaka, fa izay tena vahaolana mipaka amin’ny rehetra aloha dia tena lavitry ny kitay ny afo. Izao tokoa angamba no tonga amin’ilay fitenenana hoe: “Mahari-pery ny Malagasy ary mora manadino.” Asa lahy raha mbola hinia hikimpy hanadino ny tantara niatomboka tamin’ny 2009 mandrak’androany ?

Toky R

Tia Tanindrazana

Samia mijoro ho an'i Gasikara.