Edito

Manafotsy ny efa mainty !

Edito
Alarobia 01 Martsa 2017

Tena talentan�ity fitondrana HVM ity mihitsy ny fiarovana ny olona efa hita fa nanao ny tsy mety.

Tena manafotsy ny mainty mihitsy e ! Aiza ve ka olona efa voarohirohy amina afera be tamin’ny alalan’ny fanodinkodinam-bolam-panjakana, kanefa mbola ompiana sy harovana fatratra ao an-dapa. Tompon’andraikitra efa hita izao fa tsy nahafehy ny olom-peheziny, ka niteraka fahapotehan’ny fananan’ny mpiray tanindrazana, tamin’ny alalan’ny fandoroana ny tananany, kanefa mbola harovana fatratra ihany. Tsy vitan’ny midororo araka ny fitenin’ny tanora fa mbola manome fanafintohinana ny vahoaka satria raha sazy no andrandrain’ny rehetra fa ho azon’ireny tompon’andraikitra efa matevin-koditry ny hagegena ireny, dia fiarovana sy fanambantambazana no atolotry ny tompon’ny teny farany eto amin’ny firenena ho azy. Samy manana ny hagegeny ny tsirairay ka tsy afaka ny hifanakiana samy ao anaty fanjakana, ka aleo mifampiaro. Raha mba mifampiaro amin’ny ara-drariny moa haninona, fa dia tena toy ny fiainan-jiolahy efa nifanao fatidra mihitsy kanefa mbola mirehareha fa manam-bola sy harena, ary afaka manao izay hitsin’ny saina satria ambonin’ny lalàna. Tena mahari-pery tokoa ny Malagasy raha mbola hahazaka izany ao anatin’ny 5 taona manaraka, ary hanaiky lembenana ny kajikajy hahafahan’ny fanjakana HVM mifikitra amin’ny fitantanana an’i Madagasikara.

Toky R