Edito

Mampiesona hatrany!

Edito
Alatsinainy 06 Novambra 2017

Aiza ihany ilay fampanantenana nambaran’ny mpitondra ankehitriny manoloana izao fahoriana mihoampampana mahazo ny Malagasy izao ?

Tafakatra 600ariary mahery ny kilaon’ny vary, manjaka ny tsy fandriampahalemana,… Tena talentan’ny fanjakana HVM izany hatramin’izay ka hatramin’izao, ary vao mainka aza hahazo laka ato ho ato. Vao nanao propagandy ny filoha dia nilaza fa telo volana monja dia mivaha ny delestazy, nilaza ny praiminisitra fa ao anatin’ny fotoana fohy dia hivoaka ny marina momba ny fahatrarana mpanondrana boaderozy tany Toamasina, fa hisy trondro vaventy hosamborina. Tazomy amin’ny tenikoa ho, hoy izy. Nilaza ny minisitry ny varotra sy ny fanjifana, fa efa manafatra vary 7000 taonina isan-kerinandro eo ho eo isika ary efa misy ny vary 1400Ariary eo ho eo ny kilao. Tsena iray eto Iarivo no misy izany, ary ambaran’ny mponina fa vary ratsy kalitao. Tsy faly hanakiana, fa tratry ny hoe ny tsara tsy mba mora izany ny Malagasy vitsivitsy satria na ratsy aza, dia tsy ny rehetra no afaka hisitraka izany. Ampahany amin’ny fampanantenana sy sy fampiesonana ataon’ny mpitondra, izay toa efa lany henatra tanteraka sy tsy manome hasina ny vahoaka nametraka azy ireny. Mitohy ny fampiesonana ary vao mainka hitombo satria akaiky ny fifidianana e!

Toky R