Edito

Malaza ratsy

Edito
Sabotsy 05 Martsa 2016

Vao omaly hariva indray no jiolahy roa no maty voatifitry ny mpitandro filaminana teny Ambaranjana.

Efa jiolahy fanta-daza eny amin’iny faritra iny izy ireto raha ny fitantaran’ny manodidina. Tranga mbola manamafy indray fa tsy milamina ny eto amintsika na an-drenivohitra io na ambanivohitra ary efa tena tsy mifidy asiana mihitsy ireo jiolahy fa izay tandrify azy dia mahamay. Efa voarafitra ilay paikady vaovao hametrahana ny filaminana sy ny fandriampahalemana eto amin’ny firenena Rindra Safatsiroa ho an’ny Sehatry ny filaminana sy ny fandriampahalemana (RSS) ary natolotry ny governemanta ny filoham-pirenena ny 25 janoary 2016 lasa teo. Mby aiza moa izao ny fampiharana ? Inona no laharam-pahamehana efa nandraisana fepetra, taratasy fotsiny ve io RSS io sa mba efa nisy zavatra noraisina sy nampiharina. Toa isan’andro mantsy no andrenesana asan-jiolahy amin’ny endriny maro, betsaka ny savorovoro, miha mahazo vahana hatrany ny fitsaram-bahoaka. Tsy mahatoky intsony ny fitsarana sy ny mpitandro ny filaminana ny olona. Izany ve isika no hampiantrano fivoriana iraisam-pirenena roa amin’ity taona ity, sao dia hampitombo ny laza ratsy manerantany e !

RTT