Edito

Maizina ny tany

Edito
Zoma 28 Mey 2010

Inona no hambara raha ny Fahazavana no takonana ? Inona no mbola holazaina raha ny mpanao gazety no fonjaina ? Maizina ny tany aman-danitra. Izay no zava-misy. Terena tsy handre afa-tsy feon-dakolosy tokana ny olom-pirenena Malagasy. Tampenana tsy hahita afa-tsy loko tokana koa ny masony. Atao hazalambo izay mbola miteny na mivorivory. Ilay zo sy fahalalahana omen’ny lalàmpanorenana mihitsy ankehitriny no voahitsakitsaka. Misy ny faly, ao ny mitehaka. Narabiana ny lalàmpanorenan’ny Repoblika fahatelo. Nohafokaina ho tsy nahavita zavatra holovain-taranaka koa ny mpitondra nifandimby teto tao anatin’ny 50 taona. Dia ihazakazahana ny hanaovana toeram-pialamboly, fa izay (hono) no laharam-pahamehana. Dia hanokanana vola am-polony miliara hamalifaliana ny olona. Dia ahoana ny amin’ireo Malagasy very asa, mitombo mameno ny arabe ? Dia ahoana ny amin’ireo mpiray tanindrazana mitoloko very fanahy mbola velona fa robain’ny sasany ny fananana nohariany sy nitsembohany an-taonany maro ? Dia ahoana ny amin’ny harem-pirenena atao tantely afa-drakotra, tsy hisy holovain-taranaka ity ? Mbola hisy masoandro mihiratra sa maizina tokoa ny tany, ka handeha ihany fa hijabajaba !

Jean D.