Edito

Mahavaha olana ve ?

Edito
Alarobia 16 Martsa 2016

Tsy ambony tsy ambany ny toe-draharaha eto Madagasikara momba ny fitantanana ny firenena.

Efa ho isan’andro no andrenesana fa misy mpiara-miasa mitsidika ny filoha na ny praiminisitra na ny minisitra isan-karazany, fa tsy misy tohiny ny fihaonana. Nivadika vola ve sa nivadika sakafo sa nivadika fitaovam-pamokarana ? Ny Maorisianina izao farany teo vao nampatsiahy indray fa mazoto ho avy eto Madagasikara saingy manahy amin’ny fiarovana ny fampiasam-bolany sy ny orinasany. Azo atao hoe efa hananantsika ny rafitra fa ny fomba fampiasana azy no maisatra be. Farany aty afrika sy aty amin’ny ranomasimbe Indianina i Madagasikara, hany ka ny nosy La Réunion kely io avy no mitady handrapaka ambongadiny ny tsenan’ny Air Madagascar mankany Azia fa mody sarontsaronana amina endri-piaraha-miasa manjavozavo fotsiny aty am-piandohana. Mahafantatra tsara ny zava-misy rehetra eto marina ve ny mpitondra, mahalala ny olana ary manana vahaolana ve ? Sa mijanona ho resaka ambony latabatra fotsiny ireny paikady ambara anaty kabary ireny e ?

RTT