Edito

Mahana amin’ny ratsy atao !

Edito
Alarobia 28 Jona 2017

Mbola mitana ny sain’ny maro ny fihetsiketsehana sy ilay fiarovana fatratra ny filoham-pirenena Hery Rajaonarimampianina teny Mahamasina nandritra ny lanonana nenti-nanamarika ny fetim-pirenena.

Ny fotoana toy ireny no tsara indrindra hanehoana fa akaiky sy tsy manangana efitra amin’ny vahoaka, tsy izay anefa no niseho. Raha olona mahatsapa tena ho nanao ny marina sy mahatoky fa mamim-bahoaka dia tsy ho toy ireny mihitsy ny fihetsika. Tsy vitan’ny manangana rindrina amin’ny vahoaka fa mampanantena poakaty koa. Miezaka ny mihetsiketsika sy manarontsarona ny famotehana ny firenena nataony ny fanjakana Rajaonarimampianina. Izao vao mody mikofokofoka sy te haneho fa manao zavatra sy manasoa ny firenena. Paikadin’ny mpitondra ankehitriny ny mody manao tetikasa lehibe sy lavitr’ezaka, izay maharitra an-taonany maro, toy ny fanitarana ny seranan-tsambon’i Toamasina, izay ambara fa any amin’ny taona 2025 no hahavitany. Toy izany ihany koa ny fanitarana ny seranam-piaramanidina any Toliara, izay ambara fa ho vita any amin’ny taona 2018. Atao ireny mba hoenti-manapempo ny saim-bahoaka hifidy ny HVM, ka holazaina fa tsy ho tontosa ny tanjona sy ny fampandrosoana efa natombony raha tsy izy ireo ihany ny eo amin’ny toerany. Hatramin’izay anefa tsy hita izay natao, ka izy ireo mitombo harena amin’ny tsy ara-drariny fa ny vahoaka miha difotry ny fahantrana hatrany.

Toky R