Edito

 Nifanesy ny dia tany ivelany, izay matetika olona 30 hatramin’ny 40 no miara-dia amin’ny filoha, izay hamoahana volam-panjakana. Nitondra inona ho an’ny firenena ? Rariny ary mahafinaritra ny fitondrana ny Zaza Kanto sy fiantohana olona an-jatony maro tany Egipta nanohana ny Barean’i Madagasikara. Mbola notohizana tany Maorisy anefa, izay handaniana 15 tapitrisa ariary any ho any isaky ny ankizy. Raha natokana ho amin’ny zavatra tsara kokoa hanasoavana ireo ankizy ny volabe lany aminy ao anatin’ny andro vitsy mety hiova tanteraka ny fiainany manontolo aoriana. Tsara ilay mizara sakafo iray andro atao amin’ny mpatory an-dalana miaraka amin’ny mpaka sary hanehoana sy hakana doka fa mitsinjo ny madinika. Mety hahafaha-manao tetikasa tsaratsara kokoa ho azy ireny anefa ny volabe tsy toko tsy forohana toa lany amin’ny rendrarendra. Mitady hiverina ny resaka fiara tsy mataho-dalana ho an’ny solombavambahoaka, ary efa tena sahy mijoro ny sasany hitaky izany. Tsy ny fireharehana fa notsidihin’ny Filoha Rwandais Paul Kagame no zava-dehibe fa mba mila mahay maka lesona e! Politika isan’ny nampihariny nanomboka ny 2005, ohatra, ny “Zero Freet Policy” na “politique Zéro Véhicule”. Namidin’ny governemanta ny fiara 4 000 nampiasain’ny fonksionera, izay vesatra be ho an’ny fanjakana kanefa ahafahana manao tetikasa lehibe tena mipaka amin’ny fiainam-bahoaka. Azo atao ary efa maro ny manolo-kevitra eto amintsika fa ny fiara “Karenjy” vokarina eto no homena ireo depiote raha hanome ihany, izay tosika ho an’ny Orinasa Malagasy. Mila fahatongavan-tsaina faobe!

Toky R