Edito

Partagé sur :
• facebook

Manambana an’i Madagasikara hatrany ny loza ateraky ny savorovoro politika efa ho lava.

 Hiditra amin’ny fifidianana, hono, ny firenena ary efa tongotra mby an-dakana io, ka tsy hihemotra intsony. Ny samy kandida aza anefa dia efa mifanipaka toy ny valala an-karona, ka ao ny efa nikofokofoka hatry ny ela nanao propagandy mialoha ny fotoana fa mainka sy dodona ery handray fahefana hahafahana mampandroso ny firenena, hono, e ! Anisan’ireny iny olona fanta-daza tamin’ny fanonganam-panjakana iny, ka dia mikatsaka mafy ny mba hitondra ny anarana hoe: “Filoha voafidim-bahoaka” satria mafy ary henatra izany hibaby anarana hoe: “Putschiste” izany foana. Ao indray ireo mamondron-kery mitady hevitra hanemorana ny fifidianana, fa maro, hono, ny zavatra mbola mampiahiahy, ka ahiana tsy hadio io raharaha manga io. Mazava fa vao eo dia efa manambana sahady ny tsy fitovian-kevitra. Ny an’iza no hohenoina ary ny an’iza no hanaovana bemarenina ? Asa lahy na ho tonga amin’ilay hoe : ny hamisavisana ny ratsy no hiavian’ny soa, fa raha ny zavatra hita aloha, dia mamofompofona krizy sy savorovoro indray i Gasikara e ! Tsy misy fifampatokisana fa mifampiahiahy satria toa be loatra ny tandrametaka sy ny heverina ho hevi-petsy sy tetika maloto. Ny rafitra ara-panjakana natao hiantsoroka ny fampihavanam-pirenena moa, toa zary nisitri-belona na tsy mahavita ny asany, ka dia miandry izay higadonan’ny loza ho an’ity firenena ity angamba vao mody hikofokofoko sy hilaza fa miasa e ! Ny Raiamandreny amam-panahy kosa angamba mety kivy ka mbola mitolona am-bavaka mangina ny mba hiovan’ireto mpanao politika, izay maintimolalin’ny fitiavan-tena sy fitiavan-tseza ireto.

Toky R

Tia Tanindrazana

Samia mijoro ho an'i Gasikara.