Edito

Partagé sur :
• facebook

“Lasa ny mamba dia misosoka ny voay” ! Izay no azo hamaritana ny zava-misy amin’izao satria niala ny tolona politika, izay tsy mbola maty fa mbola misy vain’afo miotrika, dia io iaraha-mahita io ny tolona sendikaly.

 Na misy ambadika politika araka ny ambaran’ny mpitondra sasany io na tolona madio, dia tsy mahavaha olana ny fanjakana no azo hamehezana azy. Miziriziry amin’ny heviny sy mbola toa milaza tena ho mafy, ka dia manao didoha sy amboletra hanao fifidianana ihany no mahamaika. Maro ireo zavatra mila alamina sy arindra eto amin’ny firenena mialohan’ny hidirana amin’izany, saingy mety efa mandrimandry tokoa angamba ny tetika maloto ara-pifidianana any ho any, ka mila hafainganina sao hitsefotra eo. Mihevitra ve ny fitondrana fa tena hahomby araka ny hiheverany azy ny fifidianana ka hanaiky lembenana ny hafa ? Ady fiady io na ho an’ireo matanjaka mihevitra fa hahazo ny amboara na ho an’ireo kely hery mba te hitifitra lavitra hahavoazana tendrombohitra rahefa tsy misy ny fitsipika mazava hifanekena sy hifampitondrana. Tsikaritra ho mihetsiketsika fatratra ihany koa moa ireto eo amin’ny seza amin’izao, ka milaza azy ho miasa sy manao zavatra. Mipi-kelika indray fa nahazo vola indray mitete avy any amin’ny mpampanjana-bola, ka dia hoe miasa sy atokisana, ary dia hilaza fa tena mbola mamim-bahoaka atsy ho atsy. Eo vao ho tena gidraka raha mitady ho fetsy, ka raha lasa ny mamba dia handrapaka amin’izay vahoaka leo politika maloto.

Toky R

Tia Tanindrazana

Samia mijoro ho an'i Gasikara.