Edito

Lasa aloha…

Edito
Alakamisy 07 Desambra 2017

Efa iaraha-mahita ankehitriny fa miezaka manindraindra an-kolaka, izay mety ho kandidany amin’ny fifidianana filoham-pirenena amin’ny taona 2018 ny antokon’ny fitondram-panjakana HVM.

Mitety faritra ary efa ahitana taratra sahady izay mety ho fampiasana ireo fitaovana sy olom-panjakana amin’ny propagandy toy izay efa nitranga tamin’ny taona 2013 ihany. Raha ny sitrapon’izy ireo angamba dia ho zary lasa valala mitaha amin’ny lolo, zahatra mitaha amin’ny lakana na amberivatry mitaha amin’ny amontana sisa no ho fahitan’ny vahoaka ireo kandida hafa hitaha amin’izy ireo. Na eo aza anefa ny ezaka fangalarana fiaingana rehetra efa vakiana fotsiny, araka ny fitenin’ny tanora, ataon’ny HVM dia toa ny mifanohitra amin’izay noeritreretina ihany ity no mitranga satria dia tsy vitsy ny tomban-tambazotran-tserasera maneho fa any amin’ny laharana faha 4 any vao mety ahitana ny filoham-pirenena ankehitriny raha mbola kandida amin’ny fifidianana izay ho avy manaraka eo. Tsy adala ny vahoaka na manampi-maso ka tsy ahita izao fidanganan’ny vidim-piainana miharihary izao. Matoa nisy ny haintany tamin’ny fiandohan’ny taona dia nisy tsy fahaizana sy tsy fahafehezana ny lafiny serasera tao ka tsy nahatafita ny fanentanana ho amin’ny fiarovana ny tontolo iainana ary nampirongatra ny doro tanety.

Mbola hisy fanabeazana ara-pifidianana ho tafita koa ve nefa aloha amin’izao fotoana farany izao? Raha tsy ho lasa aloha koa aza ny fifidianana! Mampanahy ihany ny anton’ity propagandy mandeha be mialohan’ny fotoana ity.

J. Mirija