Edito

Partagé sur :
• facebook

Mbola nabaribarin’ny lehiben’ny antokon’ny fitondrana indray ny fankahalana sy ny hanakanana kandida iray atahorany mafy amin’ny taona 2018.

Ezahina fohazina hatrany izao atsanga tsy aman’orana hoenti-manasoketa izao hoe tsy nahaloa hetra, nandika lalàna,… Alamino aloha izay avy eo mahazo mirotsaka, hoy izy. Fa iza no nanda tsy hanara-dalàna teto ? Iza no tsy manome ny onitra ho tambin’ny fahavoazan’ilay orinasa nodorana sy norobaina, izay efa voafaritry ny tondrozotra ? Ny tahotra no mameno ny atifanahy, ka zary tonga amin’ny fitenenana hoe : “rehefa tiana hovonoina ny alika, dia lazaina fa romotra”. Mbola manaporofo hatrany ny hakanosana ny ho very seza hatrany, ka dia efa miteniteny foana indraindray. Mirehareha sy matikambo amin’ny hoe demokrasia sy fahalalahana, saingy demokrasian’ny kanosa sy ny tsy mahatoky valera sisa no mety eto. Efa tena lany henatra sy tsy miheno feom-bahoaka, fa te hampisotro ny Malagasy ny efa rano tsy tiany. Tsy mbola misy manilika ny fitondrana ankehitriny aloha izao, saingy efa fantany hatry ny ela fa tsy hahazo sitraka amin’ny Malagasy intsony izy satria fantany ny nataony. Aleo hilatsaka ny rehetra dia ho hita eo e ! Tsy adala ihany koa ny vahoaka handeha hanilika raha hitany fa nanasoa azy. Tsy izay no miseho fa teren-ko masaka fotsiny hoe izahay no eo dia izahay hatrany aloha. Efa andevom-pahefana sy lany henatra, fa tsy manan-kambo e !

Toky R

Tia Tanindrazana

Samia mijoro ho an'i Gasikara.