Edito

Partagé sur :
• facebook

Ndao hialana kely aloha ny resaka politika avo lenta fa hojerena ny fiainan’ny olona andavanandro. Tsapa amin’ny zava-misy sy ny zava-mitranga fa sahirana ara-pivelomana ny Malagasy ary tsy mahatoky ny mpitondra.

Tsy to teny ny mpitondra amin’izao fotoana, tsy voafidim-bahoaka, tsy tian’ny vahoaka, tsy maharesy lahatra ny vahoaka, tsy atokisan’ny vahoaka. Tsy midika inona ho an’ny Malagasy maro an’isa akory izay voka-pifidianana filoham-pirenena navoakan’ny CENI-T ary nohamafisin’ny CES, fa ny fantatry ny olona dia filoham-pirenena tsy nahazo ny fahatokisan’ny vahoaka i Hery Rajaonarimampianina. Ary na izy tenany aza dia efa mahatsapa tsara izany tsara isaky ny mitety faritra noho ny fahavitsian’ny olona mitsena azy sy mihaino ny kabariny. Sambany tamin’ny tantaram-pirenena ny hoe tsy feno ny kianjaben’i Mahamasina nandritra ny lanonana fianianan’ny filoha vaovao nambara fa voafidim-bahoaka ny 25 janoary 2014. Efa fambara zavatra maro ireny. Mbola manampy trotraka ny fankahalan’ny vahoaka ny fitondrana mijoro izao  ny fanararaotam-pahefana ataon’ny mpitondra sasany, ny fisetrasetran’ireo manampahefana isan’andro mandika ny lalànan’ny fifamoivoizana, ka miditra amin’izao arabe rehetra tiany izao amin’ny ora maha mety azy satria maika hiasa, hono, izy na…voaantso tampoka ho eny an-dapa. Eo ihany koa ny afera ataona manampahefana sivily sy miaramila maro, fantatry ny vahoaka ireny, ka mahatonga azy tsy hatoky intsony ny mpitondra. Efa tena latsaka an-katerena ny firenena, ny mampalahelo anefa da tena sarotra ny hamahana ny olana sy handrehetana indray ny afon’ny fitiavan-tanindrazana any amin’ny olom-pirenena tsirairay avy noho ny fahatsapan’izy ireo ny fitiavantenan’ny mpitondra fanjakana sy ny mpanao politika. Raha izao no mitohy dia ho lasa zanatany ho azy eo indray i Madagasikara e !

Tia Tanindrazana

Samia mijoro ho an'i Gasikara.