Edito

Kivy, leo, tofoka,…!

Edito
Talata 28 Mey 2019

Tontosa omaly iny ny fifidianana solombavambahoaka teto amin’ny tany sy ny firenena. Miandry ny vokatra ofisialy isika mianankavy.

Betsaka no azo resahina niainga tany am-piandohana satria tsy tambo isaina ny lesoka samihafa. Mifanjohy sy misy rohy tamin’ny fifidianana filoha iny. Tsy mbola nisy hatramin’izay naha Madagasikara an’i Madagasikara ny taham-pandraisana anjara ambany dia ambany izay 25% ka hatramin’ny 30% eo ho eo, raha ny vokatra vonjimaika omaly aloha. Kivy tanteraka ny olom-pirenena amin’izao fotoana izao. Tsy mahatoky ny fitondram-panjakana sy ny fitantanana ny raharaham-panjakana. Tofoky ny hosoka sy fanodinkodinana ny safidiny. Niharihary ny endrika tsindry bokotra sy karazana fampidirana tao anaty saim-bahoaka, fa ny kandidam-panjakana no foana no ho lany eo. Tsy marin-toerana sy tsy tohanan’ny vahoaka maro an’isa ny fahefam-panjakana, fa naman’ny samy maka ho azy ny vahoaka Malagasy sy ny mpitondra. Samy manao izay saim-patany. Rehefa manao zavatra iray, dia hakana lesona amin’ny ho avy ny lesoka tamin’ny natao teo aloha, saingy tsy izay no nisy tamin’ity fifidianana ity. Ny fifidianana filoham-pirenena, dia toa sokajiana ho fametrahana ny vato fototry ny fanjakan’i Baroa. 25 tapitrisa eo ny Malagasy, ary 10 tapitrisa no manana zo hifidy. Ny 75% amin’ny olom-pirenena 10 tapitrisa mpifidy izany izao no tofoka, ary raharaha be raha ireo no mitroatra eo!

Toky R