Edito

Kenda roroka

Edito
Alatsinainy 17 Jolay 2017

Ny faran’ny herinandro teo no efa nandeha ny resaka amin’ny hisian’ny fanovana governemanta, saingy tsy tontosa aloha hatreto.

Te hifidy ny lohany angamba ny filoham-pirenena, kanefa matahotra ny masony, ka naleo aloha nipetraka na koa mbola mety mandinika. Izany tokoa angamba no tonga amin’ny fitenenana hoe manao zavatra tsy mora. Saingy na inona na inona aloha mety ho fialana bala, dia maro ireo efa tena mandoto sy manaratsy endrika ny fanjakana, saingy mbola porofon’ny maha tratry ny kenda roroka an-dRajaonarimampianina daholo izany. Tsy mahita izay atao intsony fa toa miandry izay higadonany, ara-bakiteny angamba. Tsy inona io andrasana io, fa ny mety hialana eo amin’ny toerana na ny mety ho fahombiazan’ny hevi-petsy sy kajy maloto hahafahana mifikitra amin’ny toerana. Efa fanaon’ny fitondrana HVM hatramin’izay rahateo ny mandeha jonjorombona sy tsy misy sori-dalana fa dia mampanantena poakaty sy milaza ho manomana fiadanana ho an’ny vahoaka Malagasy hatrany. Dia mbola hahomby ihany ve ny hevi-petsy na koa mbola hanaiky ho dondrona ihany ny valalabemandry ?

Toky R