Edito

Partagé sur :
• facebook

Ho an-terisetra hatramin’ny farany ve izany no hanatontosana ny zava-drehetra mba ho tombontson’olom-bitsy ao anatin’ny 5 taona manaraka indray? Tsaroana ny fianianan’ny filoham-pirenena ankehitriny teo anatrehan’Andriamanitra Andriananahary sy ny vahoaka Malagasy nialohan’ny nandraisany fahefana 4 taona lasa izay.

 Hikatsaka ny tombontsoa ho an’ny vahoaka Malagasy rehetra aho, hoy izy izay. Ankehitriny mipetraka ny fanontaniana. Tena samy nahazo ny anjara tombontsoany tao anatin’izao fitondrana izao tokoa ve ny Malagasy tsy an-kanavaka? Sao dia ireo vahiny mpiara-miombon’antoka navela higalabona amin’ny tanin’ny Malagasy sy ny hareny, eny ny fihariany mihitsy, tahaka ny sinoa sy karana ary tiorka no miara-migalabona amin’ny fitondrana amin’ny fitavanana izany tombontsoa izany? Sao dia ireo namana akaiky ny mpitondra sy ny fianakaviany? Na eo aza anefa izany, sahin’ny fitondrana ankehitriny ny milaza fa be ny efa vita ary mitohy ny fisandratana. Sao dia terena ho ekena hoe hitohy ny tena marina? Tahaka ny nanerena ny fametrahana ilay sata mifehy ny fifandraisana sy ny nanerena ny minisitry  ny fambolena teo aloha ho lasa filohan’ny antenimieran-doholona ihany koa ve izany no hanerena ny fifidianana tsy maintsy hisy ka handaniana indray ny filoha ankehitriny? Firifiry moa izay rafitra isan-karazany nitaky ny hamoahana amin’izay ny kalandarim-pifidianana izay fa tonga amin’ilay fitenenana fahiny angamba izy ity hoe “ izay tiako ihany io ka izay tsy faly mibontsina”.

J. Mirija

Tia Tanindrazana

Samia mijoro ho an'i Gasikara.