Edito

Izay tiako ihany io !

Edito
Alarobia 11 Jolay 2012

Nangingina teo indray ny resaka Remenabila. Ilay vaomiera manokana natsangana nandritra ny filankevitry ny governemanta handray an-tanana ny serasera manodidina iny raharaha iny aza tsy nandrenesam-peo.

Soa aza fa nisy ilay “action” tao amin’ny HJRA taorian’ilay savoritaka nandritra ny fampidirana mpijery rugby teo Mahamasina ny alarobia 04 jolay, hisintonana ny adihevitra sy ny sain’ny olona mba tsy hifantoka amin-dRemenabila intsony. Rehefa manenjana indray anefa ireo sendika, ary antomotra ny datin’ny 11 jolay dia nisy andian’olona tampoka tonga tao an-tokotanin’ny HJRA milanja sorabaventy mila vaniny amin’ireo dokotera sy ny Paramed. Efa an-taonany anefa ireo no nanao fitakiana sendikaly tao tsy nisy resaka na koa hoe “réquisition”. Tampoka teo koa dia nisy fiaran’ny ministeran’ny fampianarana may teo am-pototry ny trano fonenan’ny minisitry ny fanabeazam-pirenena, Manoro Régis. Dia ho sanatria ve tetika handotoana ny Sempama indray koa iny ? Nosokafana moa ny fanadihadiana hikarohana ny marina, koa dia samy miandry ny rehetra. Fa raha ny zavatra mpitranga eto dia toa tonga amin’ny tenin-jatovo hoe izay tiako ihany io !

Jean D.