Edito

Iza no sahy velirano ?

Edito
Sabotsy 10 Martsa 2018

5 taona lasa izay dia nisy fanasana nataona tambajotram-pokonolona iray tamina kandida roa hirotsaka ho filoham-pirenena.

Anton’ny fanasana ny hanolo-kevitra hanovana ny fianianana hataon’ireo filoham-pirenena voafidy eto amin’ny tany sy ny firenena. Efa fantatr’izy mirahalahy angamba tamin’izay fotoana izay ny vontoatin’ilay fianianana ka dia tsy nanotrona izy ireo. Sambany teto amin’ny tany sy ny firenena no nisy filoham-pirenena nanao velirano amin’ny vahoaka. Vao miandoha ilay fianianana dia efa toy izao no voarakitra tao anatiny « Eto anatrehan’ny lanitra sy ny tany, miniana aho fa hanody amin’ny taranako faramandimby ny ratsy ataoko amin’ny vahoakako ! ». Iza ary angamba no tadiavinareo hofatorana amin’izany, hoy ny ao an-tsain’ireto nasaina fa tsy tonga. Azo antoka fa tsy izy mirahalahy irery no tsy sahy miatrika velirano toy izany matoa mbola resabe fotsiny foana fa tsy mety tontosa mandrak’ankehitriny ny fampihavanam-pirenena. Resabe toy izany koa ny hoe mikatsaka ny tombontsoam-bahoaka ny mpitondra sy ny mpanao politika fa raha ny fihetsika sy ny atao dia hampiandry vasoka ny efa ambavahoana eto. Hatramin’ny omby aza mizaka ny tsy eran’ny ainy amin’ny afitsoky ny rafitra misy. Iza no sahy velirano ?

J. Mirija