Edito

Partagé sur :
• facebook

Sarotra hadinoina, hono, ny lasa, indrindra, rehefa izy izay no nandratra hatramin’izao na tiana na tsy tiana.

Na hisy hanasoketa aza hoe tsy mahalala afa-tsy ny taona 2009 rehefa hanazava ny marina momba ny fahapotehan’ny firenena ankehitriny dia ialana hatrany ny tsiny fa izay aloha no voaporofo hatreto fa marina. Nohenjehina fatratra ny filoham-pirenena tamin’izany fotoana fa mpanao ampihimamba ary tsy mitsinjo ireo mpandraharaha madinika. Mety tsy fotoana handisoana na hanamarinana izay filazana izay intsony angamba izao fa andeha ary ny fomba fijerin’ireo milaza azy ho tsy ilaina indray ny mijery ny lasa no hitondrana ny resaka. Iarahan’ny rehetra mahita ary io ny zava-misy ankehitriny. Porofoy ary fa tsy manao ampihimamba ny fitondrana ankehitriny ? Hovonoina daholo ve ny Malagasy na ny eto an-drenivohitra io na ny any ambanivohitra ? Manomboka mitaraina ankehitriny ireo mpandraharaha madinika izay lazain’ny mpitondra fa tsinjoviny fa ho very fitadiavana amin’ity jiro tapaka lava ity satria mila herinaratra ireo asa miankina amin’ny teknolojia. An-drenivohitra izay fa ny any ambanivohitra dia efa mazava io ny fanotofana tanimbary an’arivony hektara sy fanalana mponina etsy sy eroa amin’ny fonenany. Ny olana ara-drano dia itambaran’ny rehetra io na ho an’ny eto na ho an’ny any ambany ravinkazo any. Hamita izay tsy vita tao anatin’ny 58 taona ao anatin’ny 5 taona no nifanarahana kanefa na ny 10 taona tokony ho vita anaty 10 volana aza ity tsy hita izay marina. Sa ve sanatrian’izany hamotika izay tsy rava tao anatin’ny 58 taona ilay nampanantenaina ?

J. Mirija

Tia Tanindrazana

Samia mijoro ho an'i Gasikara.