Edito

Ho tanteraka tokoa anie izany !

Edito
Zoma 18 Martsa 2016

Miditra amin�ny andiany faha-3 ny fifampidinihana eo amin�ny vondrona eoropeanina sy ny fanjakana Malagasy.

Tsy dia tena nahitam-bokatra ny roa voalohany natao teny Iavoloha sy Ivandry. Hita ho mbola lavitry ny afo mantsy ny kitay amin’ny fanajan’i Madagasikara ireo fepetra napetraky ny eoropeanina tahaka ny hoe : ady amin’ny kolikoly, fanjakana tsara tantana, fanajana ny zon’olombelona. Na izany aza anefa dia nosoniavina ihany ilay fanampiana ara-bola mandritra ny 5 taona amin’ny alalan’ny FED-11, mitentina 518 tapitrisa euros izy io. Tolagnaro indray no nampiantrano ny fihaonana omaly. Noresahana tao fa atao maodely amin’ny asa fampandrosoana iny tendrony farany atsimon’ny nosy iny, apetraka any rahateo ny Zone économique spéciale, iaraha-miasa amin’ny Maorisianina. Ny any atsimo izay ifantohan’ny fanampiana sy fanohanana avy amin’ny vondrona eoropeanina ary tena mbola tokony hanaovana ezaka amin’ny resaka fampandrosoana, hoy ny masoivohon’ny vondrona eoropeanina eto amintsika. Maro izay resaka izay, enga anie ka ho tanteraka tokoa ny asa ary tena hisy ny fiantraikany mivantana amin’ny fiainam-bahoaka fa efa tena reraky ny manantena tsy misy ny Malagasy ary leon’ny fampiesonana ataon’ny mpitondra. Tena misy harena eto fa na tsy voatrandraka araka ny tokony ho izy na hanjakan’olom-bitsy ka mila manitsy haingana ny fomba fiasa ny governemanta ary tokony ho sahy mijoro miady amin’ny mafia sy miaro ny tombontsoan’ny vahoaka malagasy…raha tena hanao zavatra tokoa.

RTT