Edito

Partagé sur :
• facebook

Tsy milamina ny tany ama-monina, ary tsy maniry loza fa toa mandindona ny loza ho an’ny firenena amin’izao.

Ny hamisavisana ny ratsy hiavian’ny soa, saingy raha ny zava-misy ara-politika dia aleo ihany miomana sy mailo fa mitady ho ratsy izy ity. Manomboka manangasanga sy miseho masoandro ny tsy fitovian-kevitra mahery vaika. Manomboka mamondron-kery ireo kandida filoham-pirenena sasany mihevitra sy milaza ho mahita zavatra tsy mangarahara. Misy ny efa milaza ankolaka na mivantana ny tsy fahatokisany ny rafitra mpikarakara ny fifidianana, toy ny fahatsapana fa misy ny kandida heverina fa kotrehina homena tombondahiny manokana. Mandeha ny vaky bantsilana momba ny lisi-pifidianana izay misy fanilihana ny zon’ny olom-pirenena tsy hifidy, ary misy ny fanabontsinana ny isa any amin’ny faritra mora hanambakana vahoaka, hoy ny kandida sasany. Ny mahagaga aloha dia mangina sy tsy re feo firy ireo rafi-panjakana voatonontonona, izay manaiky ny fahadisoana matoa tsy miteny sa efa milamindamina sa efa nivarotra fanahy ka tsy te hiraharaha izay menomenona any intsony ? Raha izao aloha no mitohy sy tsy voalamina dieny aty am-piandohana, dia azo antoka fa hikorontana ambony ambany ity tany ity. Ny tombontsoam-bahoaka no atao tsianjery maimbo ambara fa ambony indrindra, fa ny finiavana hitia sy hanarina ny firenena aloha, dia isaina amin’ny rantsan-tanana ireo mpanao politika tena manana izany fitiavan-tanindrazana izany. Na hatao tohatra fiakarana na hatao sorona hatrany amin’ny krizy politika ny valalabemandry e !

Toky R

Tia Tanindrazana

Samia mijoro ho an'i Gasikara.