Edito

Partagé sur :
• facebook

Mifantoka kely eny Iavoloha indray aloha ny sain’ny mpanara-baovao politika sy ireo izay mbola liana amin’ny raharaham-pirenena amin’ity anio ity.

Ankoatra ny fifampiarahabana, firarian-tsoa sy ny hanimpito loha hifampizarana eny dia andrasana izay votoatin’ny kabarin’ireo mpandaha-teny. Misy 4 izy ireo anio dia ny zokiolona amin’ireo Masoivoho eto amintsika, antenimieram-pirenena, ny praiminisitra ary ny filoham-pirenena. Ny mpiasam-panjakana, ohatra, dia miandrandra mafy ilay fisondrotan-karama mahazatra rehefa volana janoary. Inona no tena marina momba ny hoe fanoloana ny praiminsitra, fanovana mpikambana ao amin’ny governemanta ? Ahoana ny tena endriky ny fifandraisan’i Madagasikara amin’ireo mpamatsy vola sy mpiara-miombon’antoka aminy ? Ny resaka ady amin’ny dahalo, ny trafikana boaderozy sy fanondranana ny harem-pirenena. Miandry izay fanazavana avy amin’ny mpitondra ny vahoaka, misy ve sa tsia ny vahaolana ?An-kilan’izay, andrasan’ny olona fatratra izay mety ho fanazavana na fanambarana ataon’ny filoham-pirenena manoloana ny afera maha voatonontonona olona maromaro manodidina azy tahaka ny mpanolotsainy sy ramatoa vadiny, ohatra. Ny resaka fifidianana loholona nanjakazakan’ny HVM, ilàna fanazavana misimisy kokoa satria maro be ny resaka sy fanakianana manodidina azy io. Asa raha handray ny andraikiny ka hanazava tokoa ny filohan’ny repoblika na hody fanina sy hanodin-dresaka indray !

RTT

Tia Tanindrazana

Samia mijoro ho an'i Gasikara.