Edito

Hitohy ny tsy mbo zah !

Edito
Alarobia 16 Aogositra 2017

Mpanao politika, mpandinika raharaham-pirenena, hatramina olon-tsotra dia efa samy nisy nilaza fa tsy olona no olana eto fa na rafitra na fomba fitantanana.

Miaiky ny filoham-pirenena tamin’iny herinandro iny fa tsy voafehy ny fiakaran’ny vidim-piainana ary sahirana ny vahoaka. Mbola ilay vahaolana fahagola hatramin’izay nitondrany efa tsy nahomby hatrany anefa no arosony ao anatin’ilay fandaharany amin’ny haino aman-jery efa hanitsaka ny laharana faha-16 izao dia ny hoe efa miroso amin’ny fanalana ireo tsy mahavita azy. Miantso ireo tsy mahavita azy, hono, ny tenany mba hametra-pialana fa tsy miandry hoesorina. Dia hosoloina an’iza indray ary ireo heverina ho tsy nahavita ny asany ? Mba hisy hevitra avy aty ifotony ve fa tsy hoe mody asiana hevitra avy aty ifotony hiaingan’ny fanendrena izay hasolo azy ireny? Ary ilay tsy sasatry ny nanala olona hatramin’izay nitondrany ve mba tena mahavita azy tokoa sa dia faly hanilika ny tsy fetezan-javatra amin’ny hafa fotsiny ? Raha izao fandehany izao aloha dia mbola hitohy hatrany ilay fomba fitenenana hoe tsy mbo zah izay efa nahazatra ireo mpanao politika sy mpitondra hatramin’ny repoblika faharoa.

J. Mirija