Edito

Hazo avo halan-drivotra !

Edito
Zoma 28 Jolay 2017

Tanteraka tokoa ny fomba fiteny hoe ny hazo avo halan-drivotra, ary misongadina izany eo amin’ny tontolo politika, raha dinihina ny fanenjehana ny filoha teo aloha Marc Ravalomanana.

Rehefa hita fa matanjaka sy mety hahazaka olona, dia tsy maintsy finganina sy hanaovana antsojay. Mifamingana sy mifanipaka toy ny valala an-karona isika rehefa mahita fahombiazan’ny hafa satria jamban’ny fialonana sy ory hava-manana, ka tsy misaina afa-tsy ny hamotika sy hanetry izay mba misandratra. Vatra ny mandany andro sy fotoana hoenti-mikajy izay fomba hoenti-manadaraboka ny olona iray hita fa mety hahavita zavatra, fa tsy mba manam-potoana handinihana ny fomba hoenti-misaina hoe ahoana ny fomba hahafahana mahavita zavatra tsara kokoa noho iny ? Saika izany hatrany no miseho eny anivon’ny fiarahamonina eny, ka tsy atao mahagaga raha tsy mivoatra isika satria tsy mba misaina ny hioitra sy manao fifaninanana masina, fa toa nateraka hifandrafy sy hifamotika lava eto. Zary mifanome leson-dratsy, ka maniry manitra toy ny alika miambozo-koditra sisa mahita ny fahombiazan’ny hafa.

Toky R