Edito

Partagé sur :
• facebook

Lokalokan’ity governemanta Solonandrasana Mahafaly Olivier ity ny ady amin’ny hampanjakana ny tany tan-dalàna sy fanjakana tsara tantana,

 ny ady amin’ny fahalovana, ady amin’ny trafikana harem-pirenena. « Gouvernement de combat » no malaza, araka ny tenin’ny praiminisitra tamin’ny talata 12 aprily 2016, andron’ny famindram-pahefana nandraisany ny fahefana feno teny amin’ny Lapan’i Mahazoarivo. Vao miandoha anefa ity governemanta ity, dia mipoitra ny raharaha Air Madagascar. Mitaky ny hampiharana ny didim-pitsarana hiverenana amin’ny asany ireo mpitarika sendika efa-dahy nenjehin’ny minisitry ny fitaterana teo aloha, ho manao sabôtazy ny orinasa tamin’ny fitokonana nandritra ny nataon’ny mpiasan’ny Air Madagascar mitaky ny zony. Tany Manakara, nampiaka-peo hisian’ny fitsinjarana ara-drariny ny fandraisana ho mpiasam-panjakana ireo mpampianatra FRAM tany Vatovavy Fitovinany. Izao koa ny taksibe eny Itaosy, manambana hitokona noho ny fanararaotam-pahefana ataon’ireo mpitandro ny filaminana sasany mitango vola ankitsirano amin’izy ireo, ary manasazy rehefa tsy mahazo. Isan’andro vaky no andrenesana fitarainan’ny olona amin’ny fibodoana ny tanin’izy ireo ataon’ny olom-panjakana. Ny tsy fandriampahalemana sy ny gaboraraka amin’ny fitrandrahana harena ankibon’ny tany manginy fotsiny. Ny governemanta no vaovao fa misy ny fitohizan-draharaham-panjakana, ka eo no mahatonga ny maro hilaza fa sao resaka haron-tabebaka izy ity, manoloana ireo trangan-javatra etsy sy eroa ireo. Efa tena leon’ny kobaka am-bava mantsy ny vahoaka ka mety hitroatra ihany ny farany.

Jean D.

Tia Tanindrazana

Samia mijoro ho an'i Gasikara.