Edito

Hanalabara-tena

Edito
Talata 08 Desambra 2015

Mampanahy ihany ny zava-misy tato ho ato izay ka mahatonga ny fanontaniana mipetraka hoe :

fa tena hotanterahana eto Madagasikara marina ve ilay fihaonana an-tampon’ny frankôfônia amin’ny novambra 2016 e ? Io fa mikatso ny fanitarana ny seranam-piaramanidina izay vavahady lehibe idirana eto Madagasikara ary tsy maintsy manaraka ny fenitra iraisam-pirenena tahaka ny hita any an-kafa raha handray fivoriana goavana. Mbola ankamantatra ihany koa ny fanorenana ny toerana honenan’ireo delegasionina an’arivony. Sa hasisika any amin’ireo hotely efa misy eto an-drenivohitra ihany ? Raha any amin’ny resaka fotodrafitrasa dia efa mikatso tahaka izany, ahoana ny fahaizana hampiantrano sy hitantana ilay fihaonambe ? Tena vitantsika ve ? Vitan’ny fitondram-panjakana ve ny mandrindra sy miantsoroka izany, kanefa ireo zavatra tena manahirana ny Malagasy aza toa ahitany vahaolana efa ho roa taona izao ? Iaraha-mahita ny fahantrana, ny loto, ny tsy fisian’ny fandriampahalemana eto sy ny tsy fisian’ny fitoniana politika. Sao lahy ka hanalabara-tena hitetateta hampiantrano vahiny kanefa ny ao an-trano aza mikorontana ambony ambany e ?

RTT