Edito

Partagé sur :
• facebook

6 andro sisa dia ho tonga indray ny “fety”. Fety tokoa moa izany, araka ny filazan’ny mpanao politika sasany azy. 1 volana mety hahazoana vola sy hena ary fitafy “isan-karazany” amin’ireo “malalatanana mandalo” indray.

 Ny hirariana amin’ny vahoaka Malagasy rehetra dia ny hoe enga anie mba ho mailo amin’izay ! Hahay mailo tokoa anie! Tsy voalohany amin’ny fisiana fizarana nofon-kena lazaina ho mitam-pihavanana akory ity na T Shirt, raha toa ka mbola ho maro ireo kandida hanao izay. Efa maro ireo lesona nipetraka navelan’izay tantaram-pirenena tanaty repoblika niisa 4 izay. Mety misy ireo mahatsiaro tena fa nety taminy ny zava-niseho rehetra nandalo saingy ny azo antoka aloha dia maro lavitra noho izy ireo no nahatsiaro tena voafitaka tanteraka ary notapena-maso tamin’ireny zava-nandalo ireny ka mbola iverenana irariana indray hoe hahay mailo tokoa anie ! Hira fanevana antoko politika ela nihetezana iray niredona omaly no nahenoana matetika io hafatra hoe mba mailo io. Mbola maro amintsika no mahatsiaro tena ho voafitak’ireo mpanao politika nampanantena na dia efa tamin’ny 30 taona lasa aza no niforonan’ny hira toy izany. Nolazain’ilay hira fa “Afaka ny tany. Ny vahoaka koa nivoatra. Leon’ny tomany. Hainy ny mitroatra.” Mahay mitroatra tokoa ve isika raha nitolona ankehitriny ? Fitroarana nitondra soa sa maika nandetika tany amin’ny lalina no vita ? Fivoarana nitondra mankaiza no niseho ary afaka tokoa ve isika tao anatin’izay tolona marobe izay ? Maro ny safidy saingy hoe samia… mailo amin’izay !

J. Mirija

Tia Tanindrazana

Samia mijoro ho an'i Gasikara.