Edito

Gadran-drafitra

Edito
Sabotsy 02 Desambra 2017

« Néolibéralisme » na rafitra iray goavambe eto amin’izao tontolo izao izay mifantoka amin’ny fampahantrana ireo vahoaka maneran-tany na koa ao amin’ny firenena isanisany mba

hahafahana olom-bitsy mibodo samirery ny harena misy eto amin’ity tany ity. Na mpitondra fivavahana na mpahay toekarena na mpandinika fiarahamonina dia efa samy naneho hevitra fa rivotra mitsoka eto amin’izao tontolo izao io ankehitriny ary lasibatra amin’ny fampiharana azy aty amin’ny firenena an-dalam-pandrosoana. Ahoana no ahafahana manda fa tsy voagejan’io rafitra io ihany koa i Madagasikara amin’izao fotoana izao kanefa dia rafitra iraisam-pirenena mihitsy no milaza fa mitovy amin’ny taham-pahantrana misy any amin’ireo firenena anaty ady no taham-pahantrana misy eto ? Tsy efa difotry ny fahantrana noho io rafitra mamonja azy io ve isika ankehitriny matoa samosa aza hamonoana olona toy ireny mamono akoho ireny ? Na inona na inona fanazavana omen’izay tompon’andraikitra dia mbola gadran-drafitra aloha isika hatreto ka izay mahametimety ireo firenen-dehibe sy rafitra matanjaka maneran-tany hatrany no ataon’ireo mpitondra fa ambinambin-javatra sisa ilay « Tombontsoa ambonin’ny firenena ». Tsy mbola nisy fidanganam-bidim-piainana nihoatra izao iainana ankehitriny izao teo amin’ny tantaram-pirenena.

J. Mirija