Firenena marary, mpitondra

Partagé sur :
• facebook

fiainam-pirenena ankehitriny, dia miharihary fa marary i Madagasikara.

Marary amin’ny tsy fahafantarana ny tena olana, marary amin’ny tsy fihainoana, marary amin’ny fanilihana izay rehetra miteny. Jamba sy marenina ny fitondrana, tsy te hahalala afa-tsy ny tenany, tsy te hihaino afa-tsy ny feony. Tsy misy arofanina intsony, satria izay miteny sy mitsikera ny tsy mety sokajiana ho fahavalo. Tsy vao omaly sy androany no nisy fanairana. Nisy antso avo nataon’ny olobe sy Raiamandreny, nisy fanambarana nataon’ny Fiangonana, nisy fanehoan-kevitra avy amin’ny mpahay lalàna sy mpandinika. Fa henoy izany ry hazon-damosiko no setriny. Mampaneno lakolosy ny Fiangonana, fa toa tsy henoina na tsy raharahiana ka asa iza sisa no andrasana hiteny sy hananatra vao hanetry tena hanaiky ny tsy mety sy hanitsy ny dia ? Mety saropady sy mila fitandremana ity saingy tsikaritra sy hita taratra ny fitodihana amin’ireo vondrom-pivavahana samihafa, ka sanatria toa tiana hanaovana fifandanjan-kery ara-pivavahana ? Samy Malagasy ny any anatin’ireny, samy mitady famonjena, samy manana ny heveriny fa mahasoa azy, ka enga anie mba ho sanatrian’ny vava ny hilalaovana ny resaka finoana sy fivavahana amin’ny resaka fifandanjan-kery ara-politika. Ny tiana hotsindriana dia ny hoe : manimba ny fototry ijoroan’ny demokrasia ny fanaovana tsinontsinona ny antso sy ny fanamarihana momba ny fiainam-pirenena na hita aza fa misy marina sy tokony horaisina. Ny fandavana ny fanitsiana dia manakana ny fandrosoana. Fa ny tena mampahonena dia ny fomba fiatrehan’ny mpitondra amin’ny zava-mitranga: fanamarinan-tena, fanadiovan-tena, fitadiavana ala bala. Tsy misy fandraisana andraikitra, tsy misy fanekena fa nisy tsy nety, fa kabary fihantsaiana aza no mbola betsaka. Raha tsy misy fahatsiarovan-tena, raha tsy misy fihainoana marina, dia hihamafy ny fahasimbana ara-tsosialy sy ara-pitondrantena. Tsy fanonganam-panjakana no ilaina, fa fanonganana ny fomba fitondra jamba sy marenina. Tsy fifandanjan-kery ara-pivavahana no vahaolana, fa fifandanjan-kevitra ara-piarahamonina. Tsy fanadiovan-tena no tokony hatao, fa fanadiovana rafitra sy fanarenana ny fifampitokisana.,..
Toky R

Tia Tanindrazana

Samia mijoro ho an'i Gasikara.