Edito

Partagé sur :
• facebook

Mety maro ny olona nieritreritra fa hihazakazaka be ny toe-draharaha politika rehefa tafaverina an-tanindrazana ny filoha teo aloha Marc Ravalomanana. Nisy mihitsy aza no nihevitra fa hisy ny fanonganam-panjakana

. Efa hatry ny ela anefa ity filoha teo aloha ity no nanambara fa tonga hampandroso ny firenena izy fa tsy sanatria tonga hanakorontana tsy akory. Azo hanazavana tsara ny fihetsiky ny ankolafy Ravalomanana amin’izao fotoana izany satria atao amin’ny alalan’ny resaka sy fifampidinihana ny fifandaminana fa tsy amin’ny alalan’ny herisetra na fanonganam-panjakana. Tena misy ny fifampidinihana eo amin’ny fitondram-panjakana sy ny ankolafy Ravalomanana ary laharam-pahamehana voalohany ny famotsorana ity filoha teo aloha ity izay efa migadra mihitsy moa amin’izao fotoana. Sarotsarotra raisina ho an’ny olom-pirenena ity resaka ity satria vao miha nanasaro-javatra ny zava-nitranga teny amin’ny antenimieram-pirenena, tahaka ny hoe nandroso nihemotra mantsy ireo depioten’ny ankolafy Ravalomanana. Izay aloha ny zava-misy, ary Atoa Ravalomanana mihitsy, ny alahady lasa teo no efa nampita hafatra hoe : aoka ianareo hilamina, hanaja ny fitsipika ary hanaraka ny toromariky ny mpitarika. Ny tsy fantatra fotsiny dia ny hoe : moa ve tena ny mpitondra fanjakana sy ny ankolafy Ravalomanana irery no mifampidinika sy mifandresy lahatra, sa misy vondrona na antokon’olona hafa misisika ao afovoan’izy ireo  ka manasarotra ny resaka ? Efa tena mahoraka be hatrany ivelany mantsy ny raharaha Marc Ravalomanana ka maro ny mihevitra fa tsy lavitr’io fifampiresahana io ihany koa ny sehatra iraisam-pirenena, indrindra fa ny Frantsay sy ny Amerikanina.

Tia Tanindrazana

Samia mijoro ho an'i Gasikara.