Edito

Fanjakana androrosy

Edito
Alakamisy 29 Janoary 2015

Mitady 100 miliara Ariary ny governemanta hanampiana ireo traboina noho ny rivodoza Chedza sy hanarenana ny simba. Nampiasaina ny voin-kava-mahatratra mba hanetsika ny fon�ny Malagasy, indrindra ny iraisam-pirenena, mba halala-tanana hanome fanampiana

. Zovy tokoa moa no tsy hiombon’alahelo manoloana ny fahavoazana sy fahoriana mianjady amin’ny mpiray tanindrazana, fa ity fanaovan’ny fanjakana androrosy ity no mampametra-panontaniana ihany. Enga anie mba ho iny Chedza iny ihany no rivodaza nandalo ka namela takaitra teto Madagasikara amin’ity taona ity. Fa raha sanatria mbola misy hafa, isika rahateo nosy, asa inona no hatao ? Ny tena mpitondra, hono, dia mitsinjo lavitra. Nosy tsy afa-bela amin’ny rivodoza isan-taona i Madagasikara, ka tokony ho nivonona tamin’izany. Nankaiza avokoa ireo vola avy amin’ny andramena, volamena mivoaka any ivelany any ? Nankaiza ihany koa ny vola vidin’ny fiaramanidina “Force One II” sy ny azo tamin’ny fitrandrahana vy tany Soalala … no tsy mba nisy tahiry hatao tsinjolavitra fiatrehana loza, no voatery hangataka fanampiana hatrany amin’ny 100 lavitrisa sa efa fanjakana androrosy mihitsy no misy eto, mangataka lava.