Edito

Partagé sur :
• facebook

Ny atao ihany no atao fa izay hipoahany ihany no hirehetany. Na iza faly na iza tezitra tsy maintsy miroso amin’ny heveriny fa nofinofy tiany hotanterahina ny Fanjakana ankehitriny.

Ao anatin’ny fahatokisan-tena tanteraka, ka tsy te hihaino sy tsy te hahalala izay kihana avy any ivelan’ny fanjakana izany. Mitombo ny lonilony ato anatiny satria toa mihidy anaty rindrina efatra ny mpitondra, ka ny azy ihany no marina, ny azy ihany no mety,… Raha atao sarisary an-tsaina, dia efa miloko volon-doranjy ny fahefana rehetra miainga any amin’ny filoha, solombavambahoaka, ben’ny tanàna, loholona,… Tsy afa-miala bala intsony amin’ny tsy fahombiazana. Ny manahirana anefa, dia tsy arakaraka ny filan’ny Malagasy ny zavatra apetraka ho laharam-pahamehana, hany koa zary lasa fanesoana ny madinika. Any Atsimon’ny Nosy mitsipaka ny olona, lasibatry ny hanohanana,... Sahirana na ambanivohitra na an-drenivohitra, saingy manam-bola efa ho 300 miliara ariary hanaovana kianja manara-penitra ny Fanjakana. Ny mpitondra ihany anefa no milaza fa tsisy vola, ny handoavana ny karaman’ny mpiasam-panjakana aza mila tsy ho voahefa,… Eny mandadilady mangata-bola any amin’ny sehatra iraisam-pirenena. Isika ilay nolazain’ny Filoha hampindram-bola an’i Kaomoro efa resiny lavitra amin’ny lafiny toekarena. Ny ara-diplaomasia marisarisa tanteraka. Io ihany koa ny fifandraisana eo amin’ny reny malala sy ny zaza tinaizany. Ratsy ny naoty ho an’i Madagasikara, miha mahazo vahana ny kolikoly,… , saingy efa mandroso hono i Madagasikara. Sa izay ilay hoe mandroso mankany amin’ny fihemorana sy fahalovana ?

 Toky R

Tia Tanindrazana

Samia mijoro ho an'i Gasikara.