Edito

Fampihavanana

Edito
Alakamisy 18 Jona 2015

Dia miovaova marina ny toe-draharaha e ! Maresadresaka indray ingahy filoha raha toa ka mangingina ny depiote eny Tsimbazaza.

Efa mazava mantsy iny ny didy navoakan’ny HCC. Tsy azo ivalozana, tsy iadian-kevitra intsony na dia misy ihany aza ny mikasa hanao zavatra hafa. Samy manana ny paikadiny ny an-daniny sy ny an-kilany, samy manana ny eritreriny koa anefa. Asa raha mba ny fampandrosoana ny firenena tokoa no mibahana ao an-tsain’izy ireo na ny fiarovana ny seza. Ny mpitondra ambony sy manampahefana no tokony ho modely amin’ny fitondran-tena ka ho hita eo ny hifandaminan’ny filoham-pirenena sy ireo depiote, fa tsy hoe ny mpiasan’ny Air Mad sy ny mpitantana no ampirisihana hahita vahaolana haingana fa ireo mpitondra ambony kosa tsy mahay mifanaraka. Taratry ny mbola fisian’ny krizy eto amintsika ireny olana maro samihafa etsy sy eroa ireny, ary mbola mampitombina foana ny tsy maintsy hirosoana amin’ny fampihavanam-pirenena. Tsy hisy zava-banona eto raha mbola misy ny ahiahy tsy hihavanana sy ny alahelo miampy fikasana hamaly faty. Aoka hazava anefa fa tsy tokony hanakonana ny tsy mety atao ny fihavanana a !

RTT