Edito

Fampiesonana avo lenta

Edito
Alakamisy 07 Jolay 2016

Manomboka mazava ny resaka ankehitriny fa sangodim-panina sy fampiesonana no betsaka, fa raha ny tena marina dia paikady hafa indray hanadalana ny saim-bahoaka mba hanadinoany ilay fipoahana

nahafatesana sy naharatrana olona maro be teny Mahamasina tamin’ny 26 jona izao savorovoro momba ny lalàna mifehy ny fifandraisana izao. Zava-dehibe ny fahalalahana maneho hevitra ary tsy azo ekena ny teti-dratsy maloto hifehezana ny serasera sy ny asa fanaovan-gazety eto, saingy tsikaritra ho misy kajikajy ihany ao anatin’ireo tranga ireo. Inona ny antony mazava sy mitombina tsy maintsy handaniana an’io fehezan-dalàna io tampotampoka teo, kanefa 2 volana nivoriana ny depiote tsy hita popoka teny Tsimbazaza ilay izy ? Toy io foana no resaka amin’ny haino aman-jery, any anaty gazety sy eny rehetra eny, tahaka ny efa tsy misy ny asa fampihorohoroana teny Mahamasina tamin’ny alahady 26 jona. Ny resaka Beroroha moa dia nangina tanteraka teo satria nambara fa maty ilay lehiben’ny dahalo niampy malaso roa nanafika ilay bilomalaza nitatitr’olona. Ny filoham-pirenena ao anatin’izany rehetra izany mitety tanàna sy mitokana zava-bita ary manao be kabary indray. Dia sangodim-panina tahaka izany foana ve no hiainana eto e ?

RTT