Fahantram-bahoaka sisa tsy resiny!

Partagé sur :
• facebook

no mankany, no nirehareha ho mpandresy hatrany tanatin’ireo fifidianana natao teto amin’ny firenena ny fitondràna ankehitriny.

Nandresy tamin’ny fifidianana filoham-pirenena 2023. Toy izany koa tamin’ny fifidianana solombavambahoaka farany teo satria hoe nahazo ny maro an’isa. Ankehitriny moa izany dia hoe nandresy tamin’ny fifidianana ben’ny tanàna satria ny renivohitra mihitsy no nahazoana fandresena miezinezina tamin’ny salan’isa 43% mahery. Mitonona ho mpandresy hatrany, rahateo, ny fitondràna ankehitriny sy ny mpanaradia azy ireo amin’ny vanim-potoana tahaka izao ary hogahogainy ho resy lava kosa ny firehana politika neverina ho nifanandrina mivantana taminy tao anatin’izay 15 taona. Na dia maro be aza ny tsikera sy ahiahy mahakasika ny tsy fahatomombanan’ireo fifidianana nifanesy sy ny efa tsy tokony haha filoham-pirenena malagasy ny filoham-pirenena ankehitriny intsony, satria hoe efa niofo na «naturalisé» ho frantsay, dia mbola mirehareha hatrany manoloana ny heveriny ho fandresena azony teto amin’ity firenena ity ny fitondràna ankehitriny sy ny mpiaradia aminy. Mitabataba daholo ny ivelan’ny fitondràna rehetra na mpanohitra io na hery afovoany na fiarahamonim-pirenena na iza na iza hoe be loatra ny hosoka, ahoana ity «ordonnance» tampotampoka ity, niharihary ny halabato saingy rehefa nandresy fotsiny ve izany dia izay no zava-dehibe? Fandresena any anaty fifidianana ve no atao hoe politika na zava-dehibe amin’ny fanaovana politika sy fitantanana firenena sy ny manodidina an’izay? Toa tsy mahataitra ny maheno sehatra iraisampirenena mamoaka fanadihadiana sy vokatra izay maneho fa faran’ny mahantra eto ambonin’ny tany amin’izao fotoana izao ilay firenena? Toy izany koa ny fitarainan’ny maro an’isa amin’ny fidangan’ny vidim-piainana sy tsy fandriampahalemana amin’ny endriny samihafa na ny fifanararaotana sy fifanambakàn’ny samy malagasy ihany eny amin’ny fiarahamonina eny. Tsy maninona fa dia andeha atao hoe fahantrana angamba izany sisa tsy resin’ilay fitondrana! Fahantram-bahoaka sisa tsy resiny!
J. Mirija
 

Tia Tanindrazana

Samia mijoro ho an'i Gasikara.