Edito

Partagé sur :
• facebook

Mifantoka eny amin’ny antenimierandoholona Anosikely indray anio ny sain’ny mpanara-baovao. Inona indray no hitranga eny ? Iza no mety ho filoha hitarika ity andrim-panjakana ity ?

 Ny azo antoka fotsiny aloha dia matanjaka ny HVM ao ary tsy tokony hanonofy fa raha vao misy volavolan-dalàna metimety amin’ny fitondram-panjakana dia ho lany avy hatrany. Miresaka ny olon-tsotra, mifanontany eny an-dalambe sy any anaty birao : fa hatao inona marina moa izany ity antenimierandoholona ity e  ? Ary nahoana no tsy nifidy mivantana ireo mpikambana ao aminy ny vahoaka. Mbola tena manjavozavo amin’ny ankamaroan’ny Malagasy ny rafi-pitondrana sy rafi-pitantanana misy eto. Tsy mazava amin’ny olona hatramin’izao ny hoe ilay lalampanorenana nofidiana tamin’ny 2010 ve io ampiasaina io ? Tsy hain’ny olona ny manavaka ny asan’ny solombavambahoaka sy ny asan’ny loholona. Ilay hoe misy 21 tendren’ny filoha ihany koa tsy mbola azon’ny olona tsara. Manjavozavo amin’ny vahoaka matetika ny resaka politika ary tena samy manana ny heviny ny tsirairay. Amin’ny maha loholona azy ireo dia andrasana ny fampisehoan’ireto hiasa etsy amin’ny lapan’Anosikely ireto fahendrena sy fahamatorana ary fikarohana tokoa izay mahasoa ny firenena sy ny vahoaka, ka tena ho mpanolotsaina sy mpanara-maso ny fahefana mpanatanteraka tokoa izy ireo fa tsy sanatria ho lasa loholona mpanara-drenirao fotsiny.

RTT

Tia Tanindrazana

Samia mijoro ho an'i Gasikara.