Edito

Partagé sur :
• facebook

Mitsioka indray ny rivotra politika aty Afrika ao anatin’ny fifidianana, izay miafara amin’ny savorovoro sy ny krizy hatrany.

Mikorontana i Zimbabwe noho ny resa-pifidianana satria mifampiahiahy sy tsy manaiky resy ny kandidan’ny mpanohitra Nelson Chamisa, izay tohanan’i Robert Mugabe, filoha nitantana nandritra 29 taona. Ambara fa lany ny kandidam-panjakana, izay tsy iza fa ny filoha vonjimaika Emmerson Mnangagwa nasolo an’i Dadabe Mugabe rehefa naongana ny taona 2017. Raikitra ny korontana ary efa 6 ny maty hatry ny omaly. Any Mali ihany koa, dia ny 2/3 amin’ny kandida 24 no tsy manaiky voka-pifidianana noho ny ambara fa zavatra tsy ara-dalàna maro, ka nahalany ny filoha ankehitriny IBK na Ibrahim Boubacar Keïta. Mikorontana ny tany Afrikanina sasantsasany noho ny resa-pifidianana, ka hanao ahoana ny eto amintsika ? Tsikaritra sy toa hitovizana amin’ireo tranga ireo, dia tena miady mafy hitazona ny fahefana, ary voatondro ho nampiasa fahefam-panjakana hatrany. niaraha-nahita ny kajikajy tamin’ny lalàm-pifidianana, ary efa niafara tamin’ny fidinana an-dalambe, ary tsy hay izay mety tsy hampoizina ho avy eo. Ny azo hamehezana azy, dia mampiahiahy ny zava-misy ary an-kevitry ny hikorontana raha tsy mazava ny fitsipi-dalao. Tsy isika ihany fa ny volana desambra ihany koa dia hifidy izay ho filohany i RD Congo izay efa ahiana dieny ety am-boalohany ny korontana. Isika Afrikanina ve no adalam-pahefana ka miady lava sa hiniana ampiadiana ? Mifamotika, mifanongana, mifamono … Efa totoim-bitana mihitsy ve sa efa nateraka ny hampiadiana sy hambakaina ? Tsy misy nateraka hahantra sy hambakaina ary hikorontan-dava fa ny fahatongavan-tsaina no tsy misy e !

Toky R

Tia Tanindrazana

Samia mijoro ho an'i Gasikara.