Edito

Partagé sur :
• facebook

Goavana ny fivoriana momba ny toetr’andro atao any Frantsa anomboka omaly satria efa tena marary izao tontolo izao noho ny fandotoana sy fanimbana ny tontolo iainana ataon’ny olombelona

. Zavatra tsy tena mbola manaitra firy  ny malagasy ity resaka tontolo iainana ity, kanefa isika dia anisan’ny firenena nahitana fahasimban’ny tontolo iainana faran’izay haingana. Teo aloha ny fandripahana ny ala, na atao saribao ny hazo na aondrana any ivelany na hanaovana trano sy fanaka. Efa tena manify ny ala atsinanana, nambara 50 taona lasa izay fa tsy ho ritra izany mihitsy. Efa mangadihady ny ao avaratra atsinanan’i Madagasikara ao, ripaka ny hazo sarobidy izay fiarovana voajanahary iny morontsiraka iny amin’ny rivo-mahery sy ny rivodoza anefa. Tafakatra 30° C ny hafanana eto Antananarivo Renivohitra amin’izao volana desambra izao, raha toa ka 28°C farafahamboniny no nahazatra teto tamin’ny taona 1980. Maro ny tany efa maniry fasika izany hoe miofo ho tany efitra tsikelikely any atsimo. Io iaraha-mahita io ihany koa fa matevina ny rotsak’orana ka azo antoka ny hisian’ny tondra-drano isan-taona amina faritra maro eto Madagasikara. Tsy angano izany fa efa zava-misy iainana ka mila mandray andraikitra ny tsirairay amin’ny fiarovana ny tontolo iainana ary mila manana politika mazava ny fitondram-panjakana hampahafantarana sy hanentanana ny olona mba hitandrina fa tsy hanaotao foana hanimba ny zava-boary manodidina azy.

RTT

Tia Tanindrazana

Samia mijoro ho an'i Gasikara.