Edito

Partagé sur :
• facebook

Na nametra-pialana ilay nasaina nametraka na tsia na hahemotra na haroso ny fifidianana dia tsy maintsy hiafara amin’ny fifidianana ihany.

 Tsy maintsy hanao fifidianana isika, raha ny mikasika izay hitondra ity tany sy firenena ity no asian-teny. Iza no sahy hanome antoka fa tsy hisy haningana indray eny antenantenan’izay atao hoe : fihaonambem-pirenena sy tetezamita vaovao kasain’ny sasany hatranga eo ? Azo antoka ve fa hahari-pery amin’izay tetezamita tokoa isika ? Izay hitondra ao ve hahafehy tena tsy hanao ampihimamba ? Ary ireo vahoaka ve mbola hahazaka ny jaly hitombo haterak’izay mety hiakaran’ny vidim-piainana eo indray ? Fanontaniana tsara apetraka amin’ny rehetra izany. Izao dia efa manomboka ny atao hoe fifidianana fa tsy mbola amin’ny 7 novambra loatra akory. Zava-droa loha ankehitriny no firehana mifanandrina eo amin’ny tontolo politikan’i Madagasikara ka na isika hifidy ny hiroso amin’ny fifidianana na hiroso amin’ny fanorenana ifotony aloha. Vita io dia mbola haneho ny safidiny amin’ny alalan’ny fandatsaham-bato sa hisafidy ny tsy handatsa-bato ? Samy fifidianana daholo koa izany. Na hahemotra io na haroso dia ny eo ihany no ho eo, hoy ilay zokiolona izay. An’ny vahoaka Malagasy manomboka eto ny baolina. Maro ny safidy ka hahay hifidy isika sa tsia ? Ho mpifidy sa ho mpandatsa-bato ? Ho hita tokoa izany izay vokatr’iny fanambarana nandrasana ela nivaly omaly iny, hampiova inona eto amin’ny firenena.

J. Mirija

Tia Tanindrazana

Samia mijoro ho an'i Gasikara.