Edito

Partagé sur :
• facebook

Nankalazaina nanomboka ny taona 2009 ary mandraka ankehitriny ny fampandrosoana lovain-jafy. Maro ireo atrikasa efa tontosa hahatongavana tamin’izany hatramin’ny taona 2015 saingy tsy hita ny vokany teto amin’ny firenena.

Ankehitriny dia miandrandra izay ho vokany hatramin’ny taona 2022 indray ny rehetra saingy efa mahakivy sahady ny maheno fiezahana ny hampanadino izany amin’ny alalan’ilay vina malaza lazaina fa hotratrarina ny taona 2030. Mety fitaovana natao hanakonana izany koa aza angamba ireo karazam-bina sy tetikasa hafa an’ireo mpisehatra politika ankoatra ny an’ny mpitondra ankehitriny izay efa misy entina mitety faritra mihitsy ny sasany. Rehefa miara-mizotra amin’ny raharaham-pirenena anefa ny olom-pirenena tsirairay dia tsapa fa tsy taratra na dia kely akory aza ny fampandrosoana tokony ho nolovain’ny zafintsika eto amin’ity nosy maitso navela ho mena ity fa miha miditra amina trosa lovain-jafy marobe izay ireharehan’ny mpitondra isika ankehitriny. Fa inona moa ny FEC raha tsy trosa miantona ho antsika ihany kanefa dia hankalazaina ery fa antoka hamitana fotodrafitrasa maro ? Eo ny an’ny kaompaniam-pitaterana ana habakabaka Air Madagascar, ny an’ny Jirama, ny an’ny Vondrona Eoropeanina, ny an’ny Banky Afrikanina misahana ny Fampandrosoana izay santionany fotsiny ihany ary na nolazaina fa tsy hamerenam-bola aza dia aiza koa no hisy lalàn’ny tolotra sy tinady tsy hisy resaka tambiny izany ? Enga anie mba tsy ho tara ny fandraisan’izay mahatsiaro ny tenany ho tompon’andraikitra ny andraikiny manoloana izao « fanadontoloana » na « safobemantsina » mandaitra be eto amin’ny firenena izao !

J. Mirija

Tia Tanindrazana

Samia mijoro ho an'i Gasikara.